Учениците од четврто и шесто одделение на 26.09.2025 година на часот по англиски јазик го одбележаа Европскиот ден на јазиците 2025 преку низа креативни и едукативни активности.
Преку играта „Where am I?“ тие имаа можност да видат 20 фотографии од различни европски места и, користејќи јазични знаци и културни препознатливости, да откријат во кој град или држава се наоѓаат. Оваа активност ги поттикна да размислуваат, да споредуваат и да го користат своето досегашно знаење на интересен начин.
Во улога на „Language detectives“, учениците се обидоа да препознаат кој јазик е прикажан меѓу 40 различни примери. Со оваа игра ја сфатија големата јазична разновидност во Европа, а воедно научија дека секој јазик е носител на своја култура и традиција.
Овие активности се дел од прирачникот „European Day of Languages – Activity Kit 2025“, изработен од Европскиот центар за современи јазици при Советот на Европа.
На овој начин, учениците ја продлабочија својата свесност за важноста на познавањето на повеќе јазици, културната разноликост и толеранцијата меѓу народите. Јазиците се мостови што нè поврзуваат и ни овозможуваат подобро разбирање едни со други.
Одговорен наставник - Сандра Мартиновска